القيم مش رفاهية... دي حماية للبيت

أهلاًً بيكم من قلب البيت ️❤

النهاردة عايزة أتكلم عن حاجة كتير بنفتكر إنها رفاهية أو كماليات... لكن الحقيقة إنها من أساسات البيت.

القيم.

فيه بيوت بتجري ورا تنظيم اليوم، ورا الأكل والشرب والنوم والمدرسة، وبيتقال ”إحنا مشغولين بالحياة“،

بس محدش بياخد باله إن فيه حاجة أهم من كل ده...

وهي: إحنا بنعيش ليه؟ وبنربي ولادنا على إيه؟

القيم مش بس كلام بنقوله، القيم هي الحاجات اللي بتظهر مننا وإحنا مش واخدين بالنا.

لما بابا بيزعق وبيقول: ”أنا بتعصب عشان بحبكم“،

أو لما ماما بتقول: ”احنا مش بنكدب في البيت“،

أو لما الطفل يشوف إن أهله بيساعدوا بعض حتى وهما متضايقين...

كل ده اسمه قيم.

القيم هي اللي بتبني الضمير الداخلي عند الطفل،

هي اللي بتخلي البيت يبقى أمان مش بس لأن بابه مقفول،

لكن لأنه مبني على احترام، حب، عدل، تعاون.

القيم كمان بتسهل علينا التربية،

لما الطفل يعرف إن فيه قيمة اسمها ”الصدق“ أو ”الاحترام“،

بيبقى عارف إن فيه حاجات مسموحة وحاجات لأ،

مش لأننا زعقنا أو عاقبنا،

لكن لأنه هو من جواه مقتنع.

الموضوع مش لازم يكون رسمي أو صعب،

ممكن كل أسبوع نختار قيمة ونعيش بيها.

مثلاًً: ”الأسبوع ده حنركز على التعاون“،

و نسأل نفسنا كل يوم: عملنا إيه علشان نتعاون النهاردة؟

الجميل كمان إن القيم مش بتفيد الأطفال بس...

هي بتفكرنا إحنا ككبار... إحنا عايزين نكون مين؟

وبنربي ولادنا على إيه؟

مفيش بيت كامل، ومفيش أهل مش بيغلطوا...

لكن لما يكون فيه قيم واضحة، حتى الغلط بيبقى فرصة نرجع ونتعلم.

سؤال من قلب البيت:

إيه أكتر قيمة بتحسوا إنها أساسية في بيتكم؟

أو بتحلموا إنها تكون موجودة أكتر؟